Andreas Gryphius (1616-1664)

Threnen des Vatterlandes / Anno 1636

Wir sindt doch nuhmehr gantz / ja mehr den gantz verheret!
   Der frechen völcker schaar / die rasende posaun
   Das vom blutt fette schwerdt / die donnernde Carthaun
Hatt aller schweis / vnd fleis / und vorrath auff gezehret.
Die Türme stehn in glutt / die Kirch ist vmbgekehret.
   Das Rathaus ligt im graus / die starcken sind zerhawn.
   Die Jungfrawn sindt geschändt / vnd wo wir hin nur schawn
Ist fewer / pest / vnd todt der hertz und geist durchfehret.
   Hier durch die schantz und Stadt / rint alzeit frisches blutt.
   Dreymall sindt schon sechs jahr als unser ströme flutt
Von so viel leichen schwer / sich langsam fortgedrungen.
   Doch schweig ich noch von dem was ärger als der todt.
   Was grimmer den die pest / vnd glutt vndt hungers noth
Das nun der Selen schatz / so vielen abgezwungen.